Yr wythnos diwethaf ar Fferm Bargoed ger Llwyncelyn, cynhaliwyd Gwobrau Caru Ceredigion am y tro cyntaf (12 Rhagfyr 2024) i ddathlu unigolion, busnesau a phrosiectau cymunedol ar draws y sir.
Trefnwyd y digwyddiad gan Cynnal y Cardi, grŵp gweithredu lleol Ceredigion, dan faner Caru Ceredigion. Bu oddeutu 130 o geisiadau ar gyfer y gwobrau, gyda 36 yn cyrraedd y rhestrau byr ar gyfer 12 gwobr. Yn cyflwyno’r noson oedd y darlledwyr Ifan Jones Evans a Nest Jenkins, ill dau yn frodorion Ceredigion. Cafodd y tlysau ar gyfer y noson eu creu’n arbennig gan fyfyrwyr o Goleg Ceredigion ar y cyd gyda’r gof Alec Page o Lanbedr Pont Steffan wnaeth greu’r brif wobr Caru Ceredigion. Yn ôl y trefnwyr roedd y noson yn llwyddiant gyda thrawstoriad eang o gynrychiolwyr o lywodraeth leol, sefydliadau a chymuned fusnes y sir yn mynychu.
Dywedodd yr Aelod Cabinet i Gyngor Sir Ceredigion sy’n gyfrifol am yr Economi ac Adfywio, Clive Davies:
“Mae’r gwobrau’n cadarnhau sut rydyn ni wedi gweithio gyda’n gilydd i sicrhau twf economaidd cryf a chynaliadwy i Geredigion, sy’n cael ei greu a’i rannu gan bawb.
“Pleser oedd gweld cyfraniadau a llwyddiannau eithriadol ein holl enillwyr, a’r rheini ar y rhestr fer. Rwy’n gwybod bod safon yr enwebiadau wedi creu argraff fawr ar ein beirniaid a hoffwn longyfarch pawb a gymerodd ran yn ystod y noson.
“Roedd y noson yn ddathliad o’r gwaith eithriadol sy’n digwydd mewn busnesau a chymunedau ar draws Ceredigion, ac sy’n helpu datblygu cymdeithas uchelgeisiol, wydn ac unigryw lle gall cenedlaethau weld dyfodol clir iddyn nhw eu hunain.”
“Yn olaf, hoffwn ddiolch i bawb a gymerodd ran yn y digwyddiad am ei wneud yn ddathliad cofiadwy o lwyddiannau ein cymuned.”
Ymhlith yr enillwyr a’r rheini a enwebwyd oedd nifer o brosiectau sydd wedi derbyn nawdd neu gefnogaeth drwy raglen ARFOR mewn gwahanol ffyrdd, megis ArloesiAber, Delineate a Llaeth Teulu Jenkins. Enillydd Gwobr ARFOR oedd ArloesiAber, prosiect sydd yn ceisio bod yn gatalydd wrth ddatblygu ymchwil yn y biowyddorau i greu twf economaidd a buddsoddiad.
Enillydd prif wobr y noson Gwobr Caru Ceredigion oedd y cigydd Sion Jones, am ei waith diflino yn hyrwyddo a gwerthu cynnyrch lleol o’r safon uchaf sy’n blaenoriaethu gwasanaeth da a chynaladwyedd.
Mae cynlluniau yn barod ar y gweill i gynnal noson wobrau arall y flwyddyn nesaf. I ddysgu mwy am waith Cynnal y Cardi ac am newyddion pellach yn y dyfodol ynghylch y gwobrau, dilynwch y ddolen hon i’w gwefan. Yn y cyfamser, dyma restr o holl enillwyr Gwobrau Caru Ceredigion 2024:
Gwobr Arloesedd Cymunedol
Enillydd: Dyfodol Ni
Ar y rhestr fer: Yr Academi Iechyd Gwledig a Gofal Cymdeithasol (Coleg Ceredigion)
Ar y rhestr fer: Catalyddion Gofal Ceredigion
Gwobr Arloesedd mewn Busnes
Enillydd: Chuckling Goat
Ar y rhestr fer: Delineate
Ar y rhestr fer: Needle Rock | Remarkable Upholstery
Gwobr Prentis y Flwyddyn
Enillydd: Jason Vale (Needle Rock | Remarkable Upholstery)
Ar y rhestr fer: Asha Vernon (Area 43)
Ar y rhestr fer: Iestyn Rees-Greaves (Cyngor Sir Ceredigion)
Gwobr ARFOR
Enillydd: ArloesiAber
Ar y rhestr fer: Madarch Tŷ Cynan
Ar y rhestr fer: Theatr Felinfach
Gwobr Bwyd-Amaeth
Enillydd: Watson & Pratt’s
Ar y rhestr fer: Llaeth Teulu Jenkins
Ar y rhestr fer: Welshhomestead Smokery
Gwobr Ysbrydoliaeth Caru Ceredigion
Enillydd: HAHAV Ceredigion
Ar y rhestr fer: Cerflun Cymunedol Cranogwen
Ar y rhestr fer: Gill Evans
Gwobr Busnes Cymunedol y Flwyddyn
Enillydd: Area 43
Ar y rhestr fer: Hwb Cymunedol Borth
Ar y rhestr fer: Yma
Gwobr Entrepreneur Ifanc
Enillydd: Siôn Jones, Cigydd Siôn Jones
Ar y rhestr fer: Bryn McGilligan Oliver (BMO Coaching)
Ar y rhestr fer: Sara Griffith (Sara Lleucu)
Gwobr Darganfod Ceredigion
Enillydd: SeaMôr Dolphin Watching
Ar y rhestr fer: Fferm Bargoed
Ar y rhestr fer: West Wales Holiday Cottages
Gwobr Digwyddiad Llai/Cymunedol y Flwyddyn
Enillydd: Gŵyl Grefft Cymru
Ar y rhestr fer: Gŵyl Gomedi Aberystwyth
Ar y rhestr fer: Lleisiau Eraill Aberteifi
Gwobr Digwyddiad Mawr y Flwyddyn
Enillydd: JDS Machinery Rali Ceredigion
Ar y rhestr fer: Gŵyl Fwyd Llanbed
Ar y rhestr fer: Digwyddiad Glaswellt a Thail Cynaliadwy 2024
Gwobr Ceredigion a’r Byd
Enillydd: Aber Instruments
Ar y rhestr fer: Delineate
Ar y rhestr fer: Gwasg Gomer
Gwobr Caru Ceredigion 2024
Enillydd: Siôn Jones, Cigydd Siôn Jones
