Mae Cyngor Sir Caerfyrddin wedi lansio Fforwm Twristiaeth Gynaliadwy newydd, ac yn chwilio am bobl sy’n gweithio yn y sector twristiaeth i gymryd rhan. Bwriad y fforwm yw cefnogi’r sector twristiaeth yn Sir Gaerfyrddin a chynnwys busnesau, atyniadau a sefydliadau o fewn y sector mewn trafodaeth ehangach ynghylch yr hyn sydd angen ar y sector i ffynnu. Yn ôl y Cyngor, nod y fforwm yw:
- Cynnwys partneriaid allweddol yng ngwaith y Cyngor yn y sector twristiaeth, gan gynnwys materion gweithredol ymarferol, heriau a chyfleoedd
- Cael gwybodaeth gan aelodau i gefnogi’r gwaith o gynllunio a chyflawni strategaethau a gweithgareddau i gynorthwyo twf parhaus mewn ansawdd ac effaith economaidd
- Trafod yr effaith leol ac unrhyw gamau gweithredu angenrheidiol ar gyfer penderfyniadau polisi cenedlaethol yn ogystal â materion ehangach o ran y sector
- Darparu proses gyfathrebu ddwyffordd effeithiol rhwng gwahanol feysydd o’r sectorau twristiaeth, preifat, cyhoeddus a chymunedol
Bydd gofyn i aelodau’r fforwm gynrychioli’r sector twristiaeth, rhoi adborth a chynnig sylwadau ar waith prosiect a chanllawiau drafft, ystyried a rhoi cyngor ar gyfleoedd neu faterion posibl yn y sector, hyrwyddo gwaith y fforwm i eraill yn eu maes a chynnig pynciau i’w trafod hefyd.
Mae’r Cyngor yn annog y rheini sy’n gweithio yn sectorau canlynol i ymgeisio:
- Gwestai (cadwyn ac annibynnol)
- Gwely a Brecwast/gwesty bach a llety hunanarlwyo
- Carafanau/gwersylla/hostelau
- Tafarndai / bwytai
- Digwyddiadau
- Atyniadau a lleoedd i ymweld â nhw (am dâl)
- Adwerthu
Bydd aelodau o’r sector cyhoeddus a’r sector cymunedol hefyd yn rhan o’r fforwm. Bydd cynrychiolaeth gan Gyfoeth Naturiol Cymru, Dŵr Cymru a Llywodraeth Cymru/CADW yn ogystal â Chynghorau Tref a Chymuned leol. Bydd swyddogion o dimau perthnasol y Cyngor hefyd yn cymryd rhan.
Dywedodd y Cynghorydd Hazel Evans, Aelod Cabinet Cyngor Sir Caerfyrddin dros Adfywio, Hamdden a Thwristiaeth:
“Bydd y Fforwm Twristiaeth Gynaliadwy newydd yn gyfle gwych i gynrychiolwyr o’r sector twristiaeth yn Sir Gâr ddweud eu dweud ar benderfyniadau sy’n effeithio’n uniongyrchol ar eu sector.
Rydym yn chwilio am wirfoddolwyr i ymuno â’r Fforwm a fydd yn cyfarfod o leiaf ddwywaith y flwyddyn, dan fy nghadeiryddiaeth i, i gynnig dealltwriaeth werthfawr o’r sector.”
I gael rhagor o wybodaeth am y Fforwm Twristiaeth Gynaliadwy, ac i ganfod manylion ar sut i wneud cais, ewch i wefan Cyngor Sir Caerfyrddin.
