Fe gyhoeddwyd y cyfweliad hwn yn wreiddiol ar wefan GlobalWelsh.
Mae Delineate yn dîm o arbenigwyr ymchwil a thechnoleg sydd wedi’i leoli yng Ngheredigion ac yn helpu busnesau i werthuso eu brandiau a’u hymgyrchoedd marchnata. Ymunodd Delineate â rhaglen aelodaeth Busnes GlobalWelsh yn 2024. Cafodd GlobalWelsh sgwrs â’r sylfaenydd a’r Prif Swyddog Gweithredol, James ‘JT’ Turner am symud i Geredigion a sut mae’r lleoliad strategol hwn wedi hybu gallu a thwf arloesol Delineate, gan fanteisio ar gryfderau lleol i gyrraedd cyrhaeddiad byd-eang.
Ysbrydoliaeth a tharddiad:
JT, beth wnaeth eich ysgogi i ddewis Ceredigion fel canolbwynt gweithrediadau byd-eang Delineate?
Dewison ni Geredigion am sawl rheswm. Yn gyntaf, roedd cyflwyno band eang cyflym iawn yn yr ardal yn ei gwneud hi’n bosibl i seilio ein gweithrediadau uwch-dechnoleg yma, gan sicrhau bod gennyn ni’r cysylltedd angenrheidiol ar gyfer ein cwsmeriaid byd-eang. Hefyd, mae gen i gysylltiad personol â’r rhan hardd hon o Gymru, ar ôl syrthio mewn cariad â hi dros 25 mlynedd yn ôl. Mae ansawdd bywyd yma heb ei ail, ac rydyn ni’n llawn cyffro i gyfrannu at yr economi a’r gymuned leol.
Ers sefydlu ein presenoldeb yng Ngheredigion rydyn ni wedi ymrwymo i fuddsoddi’n lleol ond meddwl yn fyd-eang. Mae gennyn ni safle lleol gwych ar gyfer ein busnes, sydd hefyd yn ein galluogi i sicrhau canlyniadau ledled Cymru, y DU a’r byd.
Sut daeth y weledigaeth ar gyfer dull arloesol Delineate o gasglu mewnwelediadau defnyddwyr i fodolaeth?
Daeth ein gweledigaeth ar gyfer Delineate o gydnabyddiaeth nad oedd dulliau traddodiadol o gasglu mewnwelediadau defnyddwyr yn cyd-fynd ag anghenion busnesau modern. Roedden ni eisiau datblygu llwyfan a allai ddarparu data amser real y gellir ei weithredu i helpu brandiau i wneud gwell penderfyniadau. Trwy fanteisio ar dechnolegau uwch fel AI a dysgu peirianyddol, rydyn ni wedi creu offer sy’n cyflwyno mewnwelediadau’n gyflymach ac yn fwy cywir nag erioed o’r blaen, sy’n galluogi ein cleientiaid i fod ar flaen y gad.
Datblygiadau technolegol:
Pa dechnolegau blaengar ydych chi’n eu defnyddio i arloesi ffyrdd newydd o gasglu mewnwelediadau defnyddwyr?
Gwnaethon ni adeiladu ein platfform blaenllaw, Delineate Proximity®, sydd wrth wraidd ein harloesi. Mae’r platfform hwn yn integreiddio algorithmau AI a dysgu peirianyddol datblygedig i awtomeiddio a gwneud y gorau o’r broses arolygu gyfan.
Yn ogystal, mae ein gallu dadansoddi a yrrir gan AI yn ein galluogi i brosesu a dehongli llawer iawn o ddata’n gyflym.
Diwylliant a gwerthoedd y cwmni:
Rydych chi wedi sôn am y Gymraeg, felly a allech chi ddweud wrthyn ni pa gamau rydych chi’n eu cymryd i hyrwyddo ac integreiddio’r Gymraeg o fewn eich tîm?
Rydyn ni’n hyrwyddo’r Gymraeg yn weithredol o fewn ein tîm drwy gynnig cyfleoedd i weithwyr di-Gymraeg ddysgu’r iaith, waeth ble maen nhw’n gweithio. Mae hyn yn cynnwys dosbarthiadau iaith a sesiynau gwybodaeth ddiwylliannol – sesiynau ‘dod i adnabod Cymru’. Mae ein hymrwymiad i’r Gymraeg yn rhan o’n strategaeth ehangach i sicrhau bod ein gweithle’n gynhwysol ac yn cynrychioli’r gymuned rydyn ni’n rhan ohoni.
Dydw i ddim yn dweud bod angen i bawb fod yn rhugl yn y Gymraeg er y byddai hynny’n wych, ond mae hyd yn oed gwybod ychydig eiriau’n gallu gwneud gwahaniaeth mawr. Nid nifer y geiriau rydych chi’n eu gwybod sy’n bwysig, ond parodrwydd i’w defnyddio, gan wneud yr iaith yn rhan naturiol o’n hamgylchedd gwaith. Gall y ddealltwriaeth a’r ymdrech sylfaenol hon gyfoethogi rhyngweithiadau’n fawr a dangos parch at iaith a diwylliant Cymry Cymraeg.
Heriau a chyfleoedd:
Pa heriau ydych chi wedi’u hwynebu wrth sefydlu gweithrediadau mewn ardal wledig fel Ceredigion, a sut ydych chi wedi’u goresgyn?
Roedd sefydlu gweithrediadau mewn ardal wledig fel Ceredigion yn peri sawl her, yn bennaf yn ymwneud â seilwaith a chaffael talent. Mae cyflwyno band eang cyflym iawn wedi lliniaru rhai o’r materion seilwaith, gan roi’r cysylltedd angenrheidiol i ni ar gyfer ein gweithrediadau. Er mwyn denu talent, rydyn ni wedi cysylltu ag ysgolion a phrifysgolion lleol, gan ganolbwyntio ar amlygu ansawdd bywyd yng Ngheredigion a chynnig cyfleoedd cystadleuol.
Mewnwelediadau cwsmeriaid a’r farchnad:
Allwch chi roi enghraifft o sut mae eich atebion mewnwelediad defnyddwyr o fudd i fusnesau?
Un o’r enghreifftiau mwyaf effeithiol o’n hatebion mewnwelediad defnyddwyr ar waith yw ein cydweithrediad â The Coca-Cola Company. Roedd angen ateb arnyn nhw a allai ddarparu adborth amser real gan ddefnyddwyr am eu hysbysebion ledled y byd. Gan ddefnyddio ein platfform Proximity®, gallwn gynnal arolwg o ddefnyddwyr bob dydd a darparu mewnwelediadau uniongyrchol y gellir eu gweithredu. Roedd y dull hwn yn caniatáu i Coca-Cola addasu eu hymgyrchoedd ar unwaith, gan gynyddu effeithiolrwydd eu hymdrechion marchnata 25%.
Cynlluniau a gweledigaeth ar gyfer y dyfodol:
Sut ydych chi’n bwriadu buddsoddi ymhellach yn natblygiad economaidd Ceredigion a chyfrannu ato?
Rydyn ni’n bwriadu buddsoddi ymhellach yng Ngheredigion drwy greu mwy o swyddi gwerth uchel a chefnogi rhaglenni addysg a hyfforddiant lleol. Drwy gydweithio â llywodraeth leol, busnesau a chyflenwyr, ein nod yw creu ecosystem dechnolegol ffyniannus. Bydd ein twf a’n buddsoddiad parhaus yn yr ardal yn ysgogi gwytnwch a chynaliadwyedd economaidd, gan fod o fudd i’n cwmni a’r gymuned ehangach.
Cefnogaeth a chydweithio:
Sut mae cymorth gan fentrau fel Trawsnewid Trefi ac ARFOR wedi cyfrannu at dwf eich busnes?
Mae cefnogaeth gan fentrau fel Trawsnewid Trefi ac ARFOR wedi bod yn allweddol i’n twf. Mae’r mentrau hyn wedi darparu cyllid ac adnoddau hanfodol a’n galluogodd i drawsnewid mannau gwag yn eiddo masnachol gwerthfawr a sefydlu ein gweithrediadau yng Ngheredigion. Mae’r cymorth hwn wedi ein galluogi i adeiladu seilwaith cadarn a denu talent leol, gan osod sylfaen gref ar gyfer ein hehangiad parhaus.
Pa rôl ydych chi’n gweld GlobalWelsh yn ei chwarae yn eich cydweithrediadau yn y dyfodol?
Rwy’n gobeithio y bydd GlobalWelsh yn chwarae rhan arwyddocaol yn ein cydweithrediadau yn y dyfodol drwy gynnig cyfleoedd i rwydweithio a chysylltiadau â busnesau Cymreig eraill, partneriaid rhyngwladol a’r Cymry alltud. Bydd eu cefnogaeth drwy Hyb Cysylltwr Sir Gâr a Cheredigion yn ein helpu i ehangu ein cyrhaeddiad a’n heffaith yn lleol ac yn fyd-eang, sy’n hanfodol i gyflawni ein huchelgeisiau twf.
Arloesedd a chreadigrwydd:
Sut mae hybu arloesedd a chreadigrwydd yn eich tîm yn Delineate ymhellach?
Rydyn ni’n hyrwyddo diwylliant o ddysgu a chydweithio parhaus ac yn annog ein gweithwyr i archwilio syniadau a thechnolegau newydd, gan ddarparu cyfleoedd ar gyfer datblygiad proffesiynol a gwaith tîm traws-swyddogaethol. Mae’r amgylchedd hwn yn helpu i yrru ein hymagwedd arloesol at fewnwelediadau defnyddwyr, gan sicrhau ein bod yn aros ar y blaen i dueddiadau’r diwydiant ac yn darparu gwerth eithriadol i’n cleientiaid.
Ymgysylltu â’r gymuned:
Sut ydych chi’n sicrhau bod Delineate yn parhau i ymgysylltu’n weithredol â’r gymuned leol yng Ngheredigion?
Rydyn ni’n ymgysylltu’n weithredol â’r gymuned leol drwy gymryd rhan mewn digwyddiadau a mentrau lleol a’u cefnogi. Er enghraifft, rydyn ni’n falch o fod yn brif noddwyr Clwb Rygbi Castell Newydd Emlyn, yn ogystal â gweithio’n agos gydag ysgolion a phrifysgolion lleol. Mae hyn yn darparu cyfleoedd gwerthfawr i bobl ifanc ac yn ein helpu i adeiladu cyflenwad o dalent leol ar gyfer y dyfodol. Byddwn yn lansio ein Hymrwymiad Cymunedol Delineate yn ddiweddarach eleni, a fydd yn rhoi buddsoddiad i’n cymunedau a chyfle i dyfu ochr yn ochr â’n huchelgeisiau busnes ein hunain.
Mae modd dilyn y dolenni hyn i ddysgu mwy am Hyb Cysylltwr GlobalWelsh a Delineate a sut y gall GlobalWelsh helpu eich busnes.
